darvoza

1. Shahar, qoʻrgʻon, qalʼa, hovli va shu kabilarga kiriladigan ikki tabaqali katta eshik, qopqa.

1. Taxta darvoza. Temir darvoza.

2. Darvozaning bir tabaqasi ochiq edi. Oybek, Tanlangan asarlar

3. Tongda, qalʼa darvozalari ochilgan hamon Avaz yoʻlga tushdi. S. Siyoyev, Yorugʻlik

4. Kun choshgohga yaqin Otabek saroy darvozasidan chiqdi. A. Qodiriy, Oʻtgan kunlar

2. Kanallarda suvni toʻsish yoki qoʻyib yuborish uchun ishlangan maxsus qurilma; qopqa.

1. Qani, kanal darvozasini ochib yubor.

3. sprt. Futbol, xokkey va shu kabilar oʻyinlarda maydonning raqib yoʻllagan toʻpni (shaybani) kiritmaslik uchun himoya qilinadigan chekli qismi.

1. Paxtakorchilar raqib darvozasiga uchta toʻp kiritdilar. Gazetadan

2. Dinamo xokkeychilari raqib darvozasiga beshta shayba urib, gʻalabaga erishdilar. Gazetadan

4. koʻchma Imkoniyat.

1. Bir darvoza bekilsa, Ming darvoza ochiladi. Xalq durdonalari

5. koʻchma Sezgi, seza olish imkoni.

1. Hislar uchun yaralmish yetti darvoza. U. Ismoilov, Saylanma

6. koʻchma Boshlanish, erishish, yetishish yoʻli.

1. Goʻzallik darvozasining yoʻli — latofatda. Gazetadan

2. Bobomning bu soʻzlari menga ajoyibotlar olamining darvozasini koʻrsatib, kalitini yashirib qoʻygandek tuyuldi. S. Karomatov, Bir tomchi qon

darvoza soʻzi qatnashgan jumlalar: